‑Ɩn ‑too"‑ "mii
6
Dafi 'a 'dʋ ɔ "nyɩa bleʋn 'a klaa" ɔ 'jea ble 'de blaadɩ ‑ɩa "dbi nɩa ‑mɛ" na "kpei.
2 Tʋ "bo, ɛ 'bo 'ʋn 'srɩn ‑tu" ɛ 'de 'cɛn jri 'ʋn,
'de 'cɛn 'bo ɛ "kplun ɛ ‑wɛe ɛ 'bo 'ʋn blaa.
3 Tʋ "bo, ɛ 'je 'ma wɛe‑, 'ɩn se 'kpɩ 'ble.
Ɛ 'pʋʋ 'ʋn 'ma 'kpɩ ‑wee'‑ a ‑seea' "i.
4 Tai' "maa 'ʋn 'ɛ, 'de ɛmɛ 'e,
Tʋ "bo, blaa nɔ" ɛ 'je 'ʋn o ji ‑ɛ?
5 Ɛ ji de, Tʋ "bo, ɛ ‑seie 'ma ‑suu,
ɛ 'pʋʋ 'ʋn 'de ɛɛ' nyiɔɔ' ‑tɩ' kmaa' 'ʋn.
6 Dɛ ‑nʋɛ, nyʋ ‑mɛa seɛ 'bɛɛ ʋʋ 'je ɛɛ' ‑tɩ' ‑kwlʋ o po.
Nyʋ ‑nɩa 'e ‑gbaɩn' 'di seɛ 'bɛɛ ʋʋ 'je ɛɛ' 'nynɩ "i 'bɛɛ‑.
7 'Dii ‑fɩn" 'a a seea 'ʋn 'ɛ, "maʋ ɛ,
"jri 'a "ni" a "pɛɛn 'ma 'pɛn na' 'mɛ.
8 "Nmia pooɛ 'ma "juua fai", 'ma "jri 'wlaa 'e 'wɛ
'de nyʋ ‑ʋʋa ‑fɔan' 'ʋn tʋ o 'a ‑tɩ' 'ʋn.
9 Ao tɛɛn 'ʋn kɩɩn, ao dɛsaʋnʋʋ "klein,
Tʋ "bo 'wɔn 'ma ‑fɩn" wlu 'mɛ.
10 Dɛ 'ɩn ‑teaa' i ɛ, Tʋ "bo 'wɔɔn 'ɛ, ɛ kpʋn 'ma baewlu 'mɛ.
11 Tai' a muɛ 'ma tʋnyʋ ‑wee'‑ "maa, dɛɛ muɛ ʋʋ 'dii waa'
‑wɛe ʋʋ 'je kɩɩn ‑saa.